Dreamriver Guest House

Gastehuis

Gratis kansellasie tot 1 week voor jou verblyf!
Kapasiteit: 22 persone
Inkloktyd: 14:00 tot 18:00
Uitkloktyd: 10:00
Adres: Long-straat 38, Warrenton, 8530, Noord-Kaap
Alle ouderdomme is welkom
Vanaf R1 050 per nag, vir 2 mense

Beskrywing

Dreamriver Guest House bied gastekamers op die oewer van die Vaalrivier in Warrenton, sowat 70 km van Kimberley af. Die gastehuis is die ideale basis vanwaar gaste die besige stadslewe kan ontsnap, lieflike uitsigte oor die rivier gade kan slaan, en die pragtige Noord-Kaap-sonsondergange kan geniet.

Verblyf is beskikbaar in verskeie kamers, eenhede en huisies met plek vir 2 tot 6 gaste elk en elke eenheid is uniek versier.

Kamers 1, 2 en 3 is in die Middle House en kan apart deur verskillende gastegroepe of saam vir 'n groep van 6 gaste bespreek word. Elke kamer het 'n en suite-badkamer, 'n TV wat sekere DStv-kanale het, 'n yskassie en tee- en koffiemaakgeriewe. Die huis het 'n volledige kombuis en oopplan-eetarea en -sitarea.

Kamer 4 en 5 is houthuisies. Elke huisie het slaapplek vir 3 gaste op 'n dubbelbed en 'n enkelslaapbank, vir 'n kind, en daar is 'n privaat badkamer met 'n stort of 'n bad. Die huisies het ook elk 'n kombuisie met basiese toebehore insluitend 'n mikrogolf, ketel, yskassie en wasbak, en 'n slim-TV. Albei huisies het 'n lieflike stoep met 'n piekniekbank. Gaste kan buite sit of hul ontbyt daar geniet en oor die tuin uitkyk.

Kamer 9 is 'n moderne en luukse selfsorgwoonstel met 'n dubbelbed, en suite-badkamer, 'n volledige kombuisie met 'n mikrogolf, oond, stoof, yskas en ketel, en 'n oopplan-leefarea met etenstafel, sitarea en 'n slim-TV. Dit het 'n tweede kamer met 2 enkelbeddens wat die eenheid ideaal vir 'n gesin van 4 maak. Die eenheid is langs die swembad en lapa met braaigeriewe.

Dreamriver het 'n omsetter en 'n sonkragstelsel sodat gaste nie aan die ongemak van beurtkrag blootgestel word nie. ’n Boorgat met Jo-Jo-tenks en drukpompe verseker ook dat gaste nie ’n watertekort sal ervaar nie.

'n Heerlike ontbyt en ander maaltye kan van die a la carte-spyskaart bestel word. Maaltye kan in die privaatheid van gaste se kamers bedien word of kospakkies kan ook gereël word. Die kombuis sluit om 18:00 en gaste moet dus seker maak dat hulle betyds arriveer indien hulle aandete wil nuttig.

Die gastehuis het gratis en onbeperkte WiFi, 'n swembad en braaigeriewe. Wasgoeddienste en veilige onderdakparkeerplek is beskikbaar.

Gaste kan visvang, kanovaar en voëlkyk by die rivier. Daar is inwonende hoenders, eende en perde, asook 4 witspringbokke op die perseel.

Kry ’n Kwotasie