Oppi See

Selfsorg

Kapasiteit: 4 persone
Inkloktyd: 12:00 tot 14:00
Uitkloktyd: 10:00
Adres: Carina-weg 21, Suiderkruis, Groot-Brakrivier, 6525, Wes-Kaap
Alle ouderdomme is welkom
Vanaf R980 per nag (plek vir 4)

Beskrywing

Oppi See is 'n lieflike tweeslaapkamer-eenheid in Groot-Brakrivier wat gerieflik gemeubileer is vir 'n gesin van 4. Hier word jy saans aan die slaap gesus deur die see, en vroegoggend baljaar die dolfyne tussen die branders. Jy kan hulle maklik dophou van die balkon af. Augustus tot September kan daar ook Walvisse gesien word reg voor die huis.

Grootbrak se riviermond is 'n gewilde visvang- en swemplek, veral vir die jongklomp. Die eenheid is op die boonste verdieping geleë. Die hoofslaapkamer het 'n dubbelbed en die tweede slaapkamer het 2 enkelbeddens. Daar is 'n enkelbed in die woonkamer, indien daar 'n ekstra gas is. Die slaapkamers deel 'n badkamer met 'n stort.

Die kombuis is volledig toegerus vir selfsorg met 'n stoof en mikrogolfoond. Gaste kan maaltye aan die etenstafel geniet, of buite op die balkon. Die lapa en braai is gesellig en hier kan na hartelus gekuier word. Die leefarea het 'n TV en DStv. Die sitkamer lei na 'n groot balkon met ongelooflike see-uitsig. Daar is trappe en 'n balkon, so klein kinders se veiligheid moet in ag geneem word.

Oppi See is net 150 m van die see af. Die swemstrand het in seisoentye lewensredders aan diens. Die Spar met Tops drankwinkel en die gewilde kuierplek De Dekke, Wimpy en ander geriewe is sowat 2 km hiervandaan. Daar is verskeie besienswaardighede en doendinge in die omgewing soos visvang (vanaf die strand of diepseehengel vanaf Mosselbaai), staproetes in die berge, seilplankry in Wildernis, Die Kangogrotte in Oudtshoorn, Aarbeiplaas net voor George en meer.

Grootbrakrivier is sentraal geleë tussen Mosselbaai se hawe, Hartenbos met die ATKV en sy aktiwiteite, en George. Kom skop jou skoene uit en wandel op die pragtige, stil strand!

Ongelukkig laat ons geen troeteldiere toe nie.

Kry ’n Kwotasie