Is jy ’n kranige stapper en ’n regte avontuurdier? Hou jy van swoeg en sweet met ’n swaar sak op jou rug terwyl jy jou verkyk aan die mooi natuur? Dan is dié blog nét vir jou! LekkeSlaap het ’n lys gemaak van 6 skouspelagtige staproetes wat op jou emmerskoplysie hoort, so lees ’n bietjie, pak jou sak en voorwaarts, mars!

 

1. Die Otter, Oos-Kaap

Foto: nanda_pands (instagram) Foto: zayyaan_ederies (instagram)

Stappers durf reeds sedert 1968 die klipperige kranspaadjies langs die kus by Stormsrivier vreesloos aan. Dié paadjies kronkel vanaf die Stormsrivier-ruskamp tot by die Grootriviermonding in Nature’s Valley en vorm die gewildste staproete in Suid-Afrika. Aan die een kant kyk jy uit oor die skilderagtige see en aan die ander kant sien jy weer die immergroen Tsitsikamma-woud … Dis g’n wonder dat dié roete die eerste plek op tientalle stappers se emmerskoplysies beklee nie!

Foto: gomagsa (instagram) Foto: erasmusg (instagram)

Wanneer is die beste tyd om dié roete aan te pak? Buite die reënseisoen in die herfs of lente wanneer dit nie té warm is nie. In dié woud kan dit egter enige tyd reën, so bring jou reën-poncho saam.
Wanneer moet jy plek bespreek? Minstens ’n jaar vooraf.
Hoe ver is die roete? 42,5 km.
Hoe lank duur die roete? 5 dae.
Hoe lyk die slaapplek? Ongekunstelde houthutte met ablusiegeriewe.
Hoe moeilik is dit? Uitdagend. Die bulte is steil en die Bloukranskruising verg stapervaring.
Wat kos die roete? Sowat R1000 per persoon (kos uitgesluit).
Hoe bespreek ’n mens? Deur Sanparke se webtuiste. Gee die kantoor elke nou en dan ’n luitjie om te hoor of daar kansellasies was: 012 426 5111.

Spaar jou kragte onderweg na die Stormsrivier-ruskamp:

Lily Pond Country Lodge | Cashel Cottage, Kundalila Farm | Antlers Country Lodge

Skep ’n bietjie asem ná die staproete:

Mountain Breeze Log Cabins | Net Hier | The Fernery Lodge & Chalets | Fijnbosch Camping

2. Die Fanie Botha, Mpumalanga

Foto: elana.vorster (instagram) Foto: moe_2109 (instagram)

Die Fanie Botha word beskou as die groenste voetslaanroete in die hele land en kronkel vanaf Sabie deur denneplantasies, grasvelde en inheemse woude tot in Graskop. Die houtbruggies en mosbegroeide klippe skep ’n sprokiesagtige prentjie wat jou aan die feetjiewoud uit jou kleintyd sal herinner! Soggens is dit soms lekker mistig in dié geweste, maar smiddae word ’n mens met asemrowende uitsigte oor groen valleie beloon en die watervalle wat jy padlangs raakloop is nóg hoogtepunte.

Foto: lowveldhikers (instagram) Foto: claude_claassen (instagram)

Wanneer is die beste tyd om dié roete aan te pak? Enige tyd van die jaar, behalwe in die snikhete somermaande.
Wanneer moet jy plek bespreek? Minstens ’n jaar vooraf.
Hoe ver is die roete? 72 km.
Hoe lank duur die roete? 5 dae.
Hoe lyk die slaapplek? Afgesonderde houthutte met ablusiegeriewe.
Hoe moeilik is dit? Straf. Stappers moet fiks en gesond wees om dié roete kaf te draf.
Wat kos die roete? R105 per persoon per nag.
Hoe bespreek ’n mens? Deur SAFCOL Ecotourism se webtuiste. Gee die kantoor elke nou en dan ’n luitjie om te hoor of daar kansellasies was: 013 754 2724.

Slaap salig in Sabie onderweg na die beginpunt:

Tanamera Lodge | Bezalel Akkommodasie Sabie | Sabie Star Chalets

Herwin weer jou kragte ná die staproete in Graskop:

Panorama Chalets | Kloofsig Holiday Cottages | Mogodi Lodge | Lisbon Hideaway

3. Die Amatola, Oos-Kaap

Foto: grinsetrotter (instagram) Foto: grinsetrotter (instagram)

As jy lief is vir fantasieflieks soos The Lord of the Rings, The Hobbit en Narnia is die Amatola-staproete so rég in jou kraal — geilgroen velde en hoë bergspitse lê eindeloos voor jou uitgestrek en dit voel asof jy pens en pootjies in ’n feëverhaal is! Dié roete begin sowat 23 km vanaf King William’s Town en eindig 100 km verder in Hogsback. Dis ’n meneer van ’n roete met steil opdraandes en diep dale wat jou nogal dikwels sonder asem sal laat, maar daar is gelukkig ’n paar ontsnappingsroetes vir diegene wat nié die mas kan opkom nie. Nadat jy dié strawwe roete voltooi het, sien jy dalk selfs kans vir Kilimandjaro!

Foto: astrid.kraemer (instagram) Foto: backyardhiking (instagram)

Wanneer is die beste tyd om dié roete aan te pak? Dis baie koud in die winter en die dae is korter, en in die somer kan reën ’n probleem wees, so bespreek jou plek in herfs- of lentemaande.
Wanneer moet jy plek bespreek? Minstens ’n jaar vooraf.
Hoe ver is die roete? 100 km.
Hoe lank duur die roete? 6 dae.
Hoe lyk die slaapplek? Rustieke houthutte met bostoilette.
Hoe moeilik is dit? Uiters uitdagend. Jy moet ’n gesoute stapper wees om dié roete aan te pak.
Wat kos die roete? R1296 per persoon vir die hele roete.
Hoe bespreek ’n mens? Deur Amatola Trails se webtuiste.

Lus om lekke te ontspan voor jy met die roete wegspring? Slaap by dié salige rusplekkies naby King William’s Town:

Lavender House | Hubertha Guest House | Intaka Guest House King William’s Town

Skop jou skoene uit ná die Amatola by een van dié snoesige slaapplekkies in Hogsback:

Hogsback Inn | Bredan Self-catering Cottage | Hogsback Falls | Athanor-Hogsback

4. Die Tsitsikamma, Oos-Kaap

Foto: matt_shawesome (instagram) Foto: hesslerhoff (instagram)

Die Tsitsikamma-staproete word soms as die stiefsussie van die alombekende Otter-staproete beskou, maar moet jou beslis nie laat flous nie — die Tsitsikamma is nié vir sissies nie! Dié roete lei vanaf die De Vasselot-ruskamp in Nature’s Valley oor berge en dale tot by Stormsrivier. Dis nie net die bulte wat jou na asem sal laat snak nie, maar ook die uitsonderlike uitsigte en prentjiemooi natuurtonele wat jou om elke hoek en draai begroet.

Foto: ltjvrensburg (instagram) Foto: murrayhobbers (instagram)

Wanneer is die beste tyd om dié roete aan te pak? Herfs of lente.
Wanneer moet jy plek bespreek? Minstens ’n jaar vooraf.
Hoe ver is die roete? 62,5 km.
Hoe lank duur die roete? 6 dae.
Hoe lyk die slaapplek? Rustieke houthutte met spoeltoilette.
Hoe moeilik is dit? Uitdagend.
Wat kos die roete? R155 per persoon per dag.
Hoe bespreek ’n mens? Deur MTO Ecotourism se webtuiste.

Klim met die regte voet uit die bed by een van dié slaapplekke voor jy Tsitsikamma-staproete aandurf:

Natures Valley Beach House | Oupa Daan | African Crags Eco-Lodge | Four Fields Farm

Span lekker uit by een van dié rusplekkies ná die staproete:

Storms River Guest Lodge | Tsitsikamma Lodge | Fijnbos Camping | Meraki Guest House

5. Giant’s Cup-staproete, KwaZulu-Natal

Foto: blttnr (instagram) Foto: kevin_millar (instagram)

Sien jy nie kans vir ’n strawwe staproete nie? Dan is die Giant’s Cup-roete nét vir jou! Dié makker roete is perfek vir oud en jonk, en kronkel vanaf die Sanipas tot by die Boesmansnek aan die voet van die toweragtige Drakensberge. Dis mistige valleie, golwende groen heuwels en salige stroompies net waar jy kyk!

Foto: trailtravelers (instagram) Foto: bestofsouthafrica (instagram)

Wanneer is die beste tyd om dié roete aan te pak? Herfs of lente.
Wanneer moet jy plek bespreek? Minstens ’n jaar vooraf.
Hoe ver is die roete? 60 km.
Hoe lank duur die roete? 5 dae.
Hoe lyk die slaapplek? Ongekunstelde houthutte, baksteenhuisies en rondawels.
Hoe moeilik is dit? Matig.
Wat kos die roete? R100 per persoon per dag.
Hoe bespreek ’n mens? Deur Ezemvelo KZN Wildlife: 033 845 1000.

Begin die Giant’s Cup-roete op die regte noot en slaap voor die tyd hier:

Giants Cup Wilderness Reserve | Khotso Guest Farm | Twin Springs | Pennygum Country Cottages

Kuier ná die staproete hier:

Rougham Farm | RiverVilla | Valley of Lakes | Penwarm Country Lodge

6. Die Swart Tobie, Wes-Kaap

Foto: Wilhelm Van Zyl (instagram) Foto: Izak De Wet

Is slenterstap meer jou tipe ding? Dan is die Swart Tobie-slenterstaproete aan die Weskus perfek vir jou! Dié sirkelroete begin en eindig by die Boesmangrot anderkant Lutzville naby Koekenaap en ’n mens stap vir kilometers op spierwit strande langs die see of op stofpaadjies in die binneland! Jy hoef gelukkig nie té swaar te dra nie, want jou proviand, tent, matras en ander kamptoerusting word vir jou rondkarwei en jy kan net ’n dagsak saamdra. Los al jou sorge by die huis, vergeet van die stad se gedruis en kom op dié stapavontuur — die uitsigte is ongeëwenaard en die terrein ongerep, so jy voel sommer baie na aan Moeder Natuur!

Foto: Wilhelm Van Zyl Foto: Wilhelm Van Zyl

Bespreek een van dié lêplekke as jy voor én na die staproete ’n salige nagrus wil geniet:

Rietrylaagte Accommodation and 4×4 | Belle Ombre Gastehuis | Melkboomsdrift Lodge | Rooms With a View

Nou ja toe, waarvoor wag jy nog? Bespreek blitsvinnig jou plekkie op een van dié roetes sodat jy dit van jou emmerskoplysie kan aftiek!

Hooffoto: Sean Finaughty.