Milkwood Point

Selfsorg

Kapasiteit: 6 mense
Inkloktyd: 14:00 tot 16:00
Uitkloktyd: 10:00
Adres: Outlook-weg 56, Southbroom, 4277, KwaZulu-Natal
Geen kinders onder 12
Vanaf R2 450 per nag, vir 6 mense

Beskrywing

Milkwood Point bied gerieflike selfsorgverblyf in 'n smaakvol versierde woonstel met praguitsigte oor die strand, rotse en branders. Die woonstel is in 'n goed onderhoude kompleks in 'n stil, doodloopstraat geleë wat 'n uitsig oor die Umkobi-strand in Southbroom het.

Die woonstel is op die eerste verdieping aan die einde van 'n gang. Dit het dus geen verbygaande geraas of steurnisse nie en is heeltemal privaat. Die woonstel beskik oor 3 slaapkamers, 2 badkamers en 'n oopplan-kombuis, -sitarea en -eetarea. Daar is gratis WiFi en 'n slim-TV wat aan DStv, Netflix en YouTube gekoppel is. Die eiendom het 'n omsetter en gaste sal dus nie deur beurtkrag gesteur word nie. Water is ook altyd beskikbaar aangesien die kompleks van boorgatwater gebruik maak.

Die hoofslaapkamer het 'n koninggrootte-bed en 'n en suite-badkamer met 'n bad en stort. Die tweede slaapkamer het 2 driekwartbeddens en die derde slaapkamer het 'n dubbelbed. Die gesinsbadkamer het 'n bad, stort, toilet en 'n wasbak. Duvets, komberse, ekstra beddegoed en lakens kan voorsien word wanneer dit te warm of te koud is. Die leefarea en slaapkamers het plafonwaaiers.

Verder is daar 2 strandstoele, 'n sambreel, strandhanddoeke, baie speletjies en boeke.

Die kombuis is met 'n yskas, oond, stoof, mikrogolfoond, skottelgoedwasser, 'n Breville Barista Express 'n wasmasjien en 'n tuimeldroër toegerus. Gaste moet hul eie koffiebone saambring. Daar is ook 'n toonbank met 2 stoele. Die ruim oopplan-leefarea het 'n gemaklike hoekbank en 'n TV, asook 'n eetarea en 'n kombuis. Dit lei na die toegeboude stoep waar gaste 'n uitsig oor die see kan geniet.

Daar is ook 'n toesluitmotorhuis en onderdakparkeerplek.

Die luukse kompleks bied goeie sekuriteit, 'n speelgrond vir kinders, 2 swembaddens, 'n braai-area en pragtig versorgde tuine. Gaste het ook toegang tot 'n hekkie net 30 m vanaf die strand.

Kry ’n Kwotasie