Beskrywing

211 Bay View is 'n selfsorgwoonstel in 'n kompleks wat teen die see in die middel van Hermanus geleë is. Dié gewilde vakansiedorp aan die suidelike kus van die Wes-Kaap is wêreldbekend vir walviskyk van die land en van 'n boot af. Die natuurskoon, matige klimaat, buite-doendinge, blommeprag en ligging ten opsigte van Kaapstad, maak dit die ideale basis vanwaar die Overberg verken kan word.

Die woonstel het slaapplek vir 4 gaste en beskik oor 2 slaapkamers, 3 badkamers en 'n oopplan-kombuis en -leefarea. Die hoofslaapkamer kyk uit oor die see en beskik oor 'n dubbelbed en 'n en suite-badkamer met 'n bad, stort, toilet en wasbak. Die tweede slaapkamer beskik oor 'n dubbelbed en 'n en suite-badkamer met 'n stort. Daar is ook 'n gastebadkamer met 'n stort.

Die kombuis is ten volle toegerus vir selfsorg en beskik oor 'n skottelgoedwasser, stoof, oond, yskas-vrieskas, mikrogolfoond, eetgerei en breekware. 'n Wassery met 'n wasmasjien en tuimeldroër word ook voorsien. Die eetarea het sitplek vir 6 gaste en in die sitkamer is daar 'n gemaklike sitkamerstel en 'n platskerm-TV met sekere DStv-kanale.

Die leefarea lei na 'n toegeboude stoep met fantastiese uitsigte oor die baai. Gemeenskaplike braaigeriewe, 'n swembad en parkeerplek op die perseel is beskikbaar.