Dagsê Willem, Dit is vir ons werklik jammer om hierdie resensie te lees, veral nadat jy Vrydag nog aan ons geskryf het dat dit “regtig ‘n vreugde is om hier te kan ontspan. Baie dankie”. Ons wil tog graag ’n paar feite ter wille van duidelikheid in perspektief plaas. Ek het reeds 8 dae voor julle aankoms, in my persoonlike boodskap wat die oorspronklike kwotasie vergesel het, verduidelik dat ons normaalweg baie buigsaam is met uitkloktye. Ek het egter spesifiek versoek dat julle in hierdie geval streng by die voorgeskrewe uitkloktyd hou, aangesien ons reeds ’n bevestigde bespreking gehad het met nuwe gaste wat om 14:00 sou arriveer. Hierdie versoek is (soos jy weet en op skrif het) uitdruklik as ’n voorwaarde vir die kwotasie gestel, nog voordat julle die bespreking aanvaar het. Ek het in fact gevra dat julle tussen 9-10vm moet uitcheck asb. Die uitkloktyd van 10:00 word ook duidelik op ons gaste-inligtingstuk op Lekkerslaap aangedui. Toe ons ná 10:00 sien dat alles steeds stil en toe was, het ons julle om 10:02 geskakel, daarna ‘n uiters respekvolle whatsap gestuur, en toe weer om 10:08 telefonies probeer kontak maak. Eers nadat ons geen antwoord ontvang het nie, het ons geroep om julle aandag te kry. Ons kon uiteindelik 10:30 toegang kry om vir ons volgende gaste voor te berei. Dit was geensins ons bedoeling om julle te laat voel dat julle “uitgeboender” word nie. Ons moes bloot die vooraf gekommunikeerde uitklokreëling nakom om voldoende tyd vir die skoonmaak en voorbereiding van die huis vir ons volgende gaste te verseker. Wat ons veral jammer vind, is dat hierdie onaangename situasie waarskynlik met ’n eenvoudige gesprek voorkom kon word. Indien julle ons vooraf van die onvoorsiene omstandighede of die behoefte aan ’n later vertrek in kennis gestel het, sou ons graag probeer het om julle tegemoet te kom, soos ons normaalweg met ons gaste doen. Wat die ander punte betref: Ons vra opreg om verskoning vir die beskadigde toiletdeksel en sal daaraan aandag gee. Ons sal ook die stort ondersoek. Die probleem met die hek se afstandbeheer sou ons graag onmiddellik reggestel het indien dit tydens julle verblyf onder ons aandag gebring is. Die afwesigheid van WiFi word wel duidelik op ons advertensie aangedui. Ons doen werklik moeite om aan elke gas ’n rustige, aangename en ontspanne verblyf te bied. Daarom is dit vir ons teleurstellend dat ’n situasie wat waarskynlik deur eenvoudige kommunikasie voorkom kon word, nou die indruk skep dat ons ons gaste ongasvry behandel. Ons glo dat gasvryheid, goeie kommunikasie en wedersydse respek hand aan hand loop. Dankie vir julle terugvoer. Ons neem die punte wat aandag verdien ter harte en bly daartoe verbind om Die Skulphuis ’n besondere plek vir ons gaste te maak. Skulphuis Groete!