Berg Residence

Selfsorg

Kapasiteit: 4 mense
Inkloktyd: 14:00 tot 19:00
Uitkloktyd: 11:00
Adres: Bergpad 113A, Vishoek, Kaapstad, 7800, Wes-Kaap
Alle ouderdomme is welkom
Vanaf R1 400 per nag (plek vir 4)

Beskrywing

Berg Residence is teen die berge in die kusdorpie Vishoek geleë. Dit bied 'n uitsig oor die vallei, omliggende berge en die see in die verte.

Die huis beskik oor 2 slaapkamers, 2 badkamers, 'n oopplan-kombuis, -eetarea en -sitarea. Die hoofslaapkamer het 'n dubbelbed en dubbeldeure wat na 'n balkon met 'n uitsig op die berg en omliggende area lei. Die tweede slaapkamer is op die onderste verdieping en het 2 enkelbeddens. Hierdie kamer is stil en gaste in hierdie kamer het toegang tot die aangrensende badkamer met 'n stort-oor-bad, wasbak, toilet en 'n bidet. Die ander badkamer het 'n stort, wasbak en 'n toilet. Alle linne en handdoeke word voorsien.

Die oopplan-kombuis is met 'n yskas-vrieskas, stoof, oond, mikrogolfoond, eetgerei, breekware en 'n koffiemasjien toegerus. Daar is ook 'n wasmasjien. Die kombuis lei na 'n eetarea met 'n etenstafel met 6 stoele. Op sy beurt lei die eetarea na 'n helder en lugtige sitarea met gemaklike rusbanke en 'n TV met die volle DStv-pakket.

Die eetarea en kombuis lei na 'n onderdakdek waar gaste ontbyt kan geniet of aan 'n skemerkelkie teug terwyl die sonsondergang die lug oranje verf. Die kuier- en braai-area is op die onderste dek. Hier kan gaste voor die vuur ontspan, lekker braai, sonbaai of net op die swaaibank saam met 'n geliefde ontspan.

Die prentjiemooi dorpie Vishoek het 'n lieflike swemstrand wat op sonnige dae baie gewild is. Daar is ook 'n voorstedelike treinspoorroete tussen Kaapstad in die noorde en Simonstad in die suide. Die kusvoorstad is 'n gewilde woonbuurt vir sakereisigers en vakansiegangers. Die tradisionele industrie van trekvisvang en hengel deel die area met vakansiegangers wat branderplankry, met kajakke in die water baljaar, seil of sonbaai. Daar is 'n verskeidenheid restaurante in Vishoek en die omliggende areas genaamd Kalkbaai, Muizenberg, Simonstad en Noordhoek.

Vishoek is net 40 minute se ry vanaf die Kaap van Goeie Hoop Natuurreservaat, 20 minute se ry vanaf die pikkewynkolonie by Boulders-strand en ongeveer 12 minute se ry vanaf Simonstad. Bootuitstappies om die robbe te besigtig en haaihokduik-avonture is ook in die omgewing beskikbaar.

Kry ’n Kwotasie