Kaltenbach Cottages

Selfsorg

Kapasiteit: 6 mense
Inkloktyd: 14:00 tot 19:00
Uitkloktyd: 10:00
Adres: Houtbosdorppad J24 A, Magoebaskloof, 0730, Limpopo
Alle ouderdomme is welkom
Vanaf R900 per nag, vir 2 mense

Beskrywing

Kaltenbach Cottages is in die sogenaamde 'Misty Mountain' van Magoebaskloof tussen Polokwane en Tzaneen, en sowat 500m vanaf die R71 op die Houtbosdorppad, geleë. Dit is naby gewilde trou-venues in Magoebaskloof en Haenertsburg. Verblyf is in twee kothuise, Takbok en Loerie, beskikbaar.

Die kothuise is op 'n heuwel geleë, en spog met besonderse uitsigte oor die Essenhout Woud, waarin die hoogste boom in Afrika, asook die hoogste aangeplante boom in die wêreld, gevind kan word.

Takbok-kothuis is geskik vir 4 gaste en het 2 slaapkamers met twee enkelbeddens elk. Die badkamer het 'n stort, toilet en wasbak. Die leefarea met sy oopplan-uitleg beskik oor 'n kombuis, eetarea en sitarea met 'n groot binnebraai. Die kombuis is met 'n tweeplaatgasstoof, mikrogolf, yskas-vrieskas, eetgerei, breekware en tee- en koffiemaakgeriewe toegerus. Daar is ook 'n etenstafel met sitplek vir 6 gaste en 'n skuifdeur wat na 'n houtdek met 'n asemrowende uitsig lei. Takbok-kothuis bied boeke, tydskrifte, bordspeletjies, en legkaarte vir vermaak.

Loerie-kothuis is 'n eenvertrek-eenheid. Dit bied slaapplek aan 2 gaste en beskik oor 2 enkelbeddens wat op versoek in 'n koninggrootte-bed omskep kan word. Daar is 'n stort, wasbak en 'n toilet in die aparte badkamer. 'n Kompakte kombuisie is volledig toegerus met kook- en eetgerei, twee-plaat gasstofie, yskas en mikrogolf. Die twee-sitplek eetarea bied 'n pragtige uitsig oor die inheemse bos, en 'n outentieke stofie dien as kaggel gedurende die berg se koel aande.
Bo-op die eenheid is 'n braai-area met 'n panoramiese uitsig oor die omgewing. Die braai-area is ingesluit by die tarief.

Beide eenhede het nie TV nie, maar gratis WiFi word voorsien. Stap, forelhengel, asook 'n waterval met 'n swempoel is 'n paar van die aktiwiteite wat alle gaste op die plaas kan geniet. Kaltenbach se labradors sal gaste graag na die swempoel vergesel!

Die kothuise is ook sentraal naby voetslaan- en bergfietsroetes en die Haenertsburg Trout Association se damme en riviere geleë.

Kry ’n Kwotasie