Effortless stay, paradise, beach holiday.
Ek is gewoonlik nogal krities wanneer dit by verblyf en vakansies kom, en dit gebeur selde dat ek ’n plek verlaat en dink: ek sou môre weer terugkom. Maar Simplex 9 @ The Dunes was eerlikwaar een van die beste vakansies wat ons nog ooit gehad het – en dit sluit oorsese reise in. Die eenheid is sowat 10 minute buite Plettenbergbaai en minder as 5 minute van Keurboomsstrand af, binne ’n veilige woonlandgoed wat vroeër ’n hotel was. Dit voel nie soos ’n gewone vakansieplek nie – dit voel soos ’n oord waar jy regtig kan afskakel. Jy kan strand toe stap (daar is wel ’n bult, so dis nie net ’n reguit wandeling nie), maar as jy gelukkig is, kry jy sommer ’n lift saam met ander vakansiegangers op hul gholfkarretjies. Die strand self is iets besonders – ’n pragtige Blouvlagstrand, meestal net vir inwoners met lewensredders. Sonsondergang by die strand is ’n móét. Teen laatmiddag begin mense afstap met piekniekmandjies, kinders en stoele – dit raak ’n hele ritueel en iets wat mens regtig nie wil misloop nie. Ons is met aankoms persoonlik verwelkom deur Jeanne, en welkom laat voel, sy het dadelik op enige boodskap gereageer en was baie vriendelik. Die Simplex is bo die grondvloer geleë en vir ons perfek geplaas. Die nuwe dek kyk uit oor ’n groot grasperk en bome, en dit het vinnig ons gunstelingplek geword. Elke oggend het ons koffie gedrink terwyl Knysna-loeries mekaar in die bome rondgejaag het reg voor ons – iets wat mens nie elke dag beleef nie. Binne is die eenheid prakties, gemaklik en goed ingerig vir sy grootte. Die leefarea het ’n connected TV en betroubare WiFi. Die kombuis is nie groot nie, maar werk regtig goed – vinnige stoof en oond, en meer as genoeg basiese toerusting om gemaklik kos te maak. Daar is tot 'n braai bak! Die tweede slaapkamer met twee enkelbeddens was modern, baie gemaklik en het goeie kasruimte. Die hoofslaapkamer was vir my ’n groot pluspunt – die dubbeldeure wat na die dek oopmaak maak ’n enorme verskil, en ons het dikwels met dit oop geslaap. Die bed was heerlik gemaklik. Ons is ’n gesin van vier met seuns van vier en ses, en die badkamer het vir ons heeltemal gewerk. Die seuns was presies op daardie ouderdom waar stort iets nuuts en lekker is, en alles was eenvoudig en prakties. Wat hierdie plek egter regtig laat uitstaan, is die landgoed self. Direk voor die eenheid is ’n jungle gym, en die swembad is net ’n kort entjie weg – en volledig omhein, wat vir ons as ouers ’n enorme bonus was. Die swembad is perfek vir kinders én grootmense, met ’n vlak gedeelte vir kleintjies en ’n dieper deel vir volwassenes. Die water was warm (selfs vir ons Kaapstad-mense!), en ons het letterlik elke dag meer as een keer gaan swem, soms vir ure. Daar is ook ’n klein winkeltjie binne die kompleks, wat ongelooflik handig was – van basiese noodsaaklikhede tot ontbyt, en selfs die opsie om wasgoed te laat doen. Dis daardie klein geriewe wat ’n vakansie net soveel makliker gemaak het. Selfs oor Kersfees en Nuwejaar was dit rustig. Mense was vriendelik, ordentlik en respekvol. Geen geraas of chaos nie. Ons kinders kon op hul fietse rondry, vriende maak en speel, en ons kon van die dek af sit en kyk. Vir ouers met jong kinders is dit goud werd. Ons het 11 nagte gebly en die dae het natuurlik gevloei: oggende vir strand of uitstappies, middae by die swembad, en saans rustig afsluit. Daar is ongelooflik baie om te doen naby: Singing Kettle Beach (waar ek vir ure in die see kon ronddryf soos 'n kind!) en stap na Arch Rock was 'n absolute hoogtepunt, Knysna uitstappie, Nature’s Valley, Tsitsikamma-woud, staptogte en wildkyk – alles binne maklike bereik. Ons kon nie naastenby by alles uitkom in 12 dae nie, ons moet terugkom! Hierdie was een van daardie vakansies waar jy regtig afskakel, sonder om ooit verveeld te wees. Goeie, kwaliteit tyd. Pret. Rus. Natuur. Alles wat mens hoop ’n vakansie sal wees. Ons kyk reeds na beskikbaarheid vir volgende jaar.
