by Mount Rose Self-catering Guest House | LekkeSlaap

+29

Mount Rose Self-catering Guest House

9 resensies

Selfsorg

Voorkeurvennoot
Kapasiteit: 8 persone
Inkloktyd: 14:00 tot 22:00
Uitkloktyd: 10:00
Adres: Roosstraat 230, Clarens, 9707, Vrystaat
Alle ouderdomme is welkom
Vanaf R4 960 per nag (vir 8 persone)

Beskrywing

Mount Rose Self-catering Guest House is in die prentjiemooi dorpie Clarens in die Vrystaat en bied 'n pragtige berg-uitsig en 'n rustige omgewing. Die tuin is ten volle omhein en klein troeteldiere is welkom. Die huis is na aan die middedorp en loopafstand vanaf restaurante, winkels en koffiewinkels af.

Slaapplek is beskikbaar vir 8 gaste in 'n huis met 4 slaapkamers, 3 en suite-badkamers, 'n gaste-toilet, 'n eet- en leefarea, 'n veranda en 'n tuin.

Die grootste slaapkamer, Vrede, is op die boonste verdieping geleë en beskik oor 'n koninggrootte-bed, 'n en suite-badkamer met 'n hoekbad, stort, wasbak met 'n kassie en 'n toilet. Die kamer het ook 2 leunstoele, ingeboude kaste en 'n privaat balkon met panoramiese berg-uitsigte.

Die tweede slaapkamer, Geloof, is op die middelste verdieping en het 'n eie toesluit-ingang en buitedeur en sy eie voorportaal. Die kamer het 'n koningingrootte-bed en 'n en suite-badkamer met 'n stort, wasbak en 'n toilet. Daar is ingeboude kaste.

Die derde slaapkamer, Liefde is ook op die middelste verdieping. Die kamer het 'n binne- en buite deur en is met 'n koningingrootte-bed, 2 leunstoele en ingeboude kaste toegerus. Die en suite-badkamer het 'n stort, wasbak en toilet.

Die vierde slaapkamer, Vreugde, is die kleinste slaapkamer en op die onderste verdieping geleë. Hierdie kamer is ideaal vir kinders. Die kamer is ingerig met 2 enkelbeddens, ingeboude kaste en binne- en buite deure. Gaste kan een van die badkamers deel sonder om deur die ander kamer te loop.

Die groot kombuis is toegerus met 'n dubbeloond, vierplaatstoof, mikrogolfoond, ketel, broodrooster, 2 koffiedompelpotte, 'n yskas-vrieskas, skottelgoedwasser en 'n tuimeldroër. Daar is tans nie 'n wasmasjien nie, maar daar is 'n wassery in die dorp. Eetgerei, breekware, potte, panne en kook- en eetgerei en 'n verskeidenheid glase word ook voorsien.

Die oopplan-leefarea beskik oor 'n etenstafel vir 6. Die sitkamer het 3 groot banke, sytafels, 'n sentrale koffietafel, TV-kabinet en 'n groot kaggel. Gaste is welkom om hul eie DStv-dekodeerder en -slimkaart saam te bring. Gratis WiFi toegang is beskikbaar. Groot dubbeldeure lei vanaf die eet- en-sitkamer na die ruim onderdak stoep met 'n uitsig.

'n Skoonmaakdiens kan gereël word wanneer gaste inklok. Stel asb. die instansie ten minste 48 uur voor die inklokdatum in kennis.

Die dubbeldeurmotorhuis werk met 'n afstandbeheer en daar is 'n alarmstelsel in die motorhuis en die hoofslaapkamer. Die res van die tuin is met 3 hekke omhein.