Karee Krans Camp & 4x4

Rus vir die siel.

Die fotos op die webwerf kom nie naby aan hoe asemrowend mooi die plek is nie. Die Karee Krans Camp & 4x4 is baie goed toegerus en afgeleë, wat absolute stilte en privaatheid bied. Aandag is gegee aan die klein details soos melk in die yskas, 'n sak ys, en 'n bederfie vir die kinders en die ouers.

'n Ware skat in die Bosveld.

Dis die een plek waaroor ek nie wil skryf nie want ek wil dit eerder vir myself hou. Ons het ons tyd by Karee Krans ongelooflik baie geniet. Dis 'n Bosveld vakansie vir die boeke! Die personeel is vriendelik en behulpsaam. Die kamp is so mooi opgepas en netjies. Die diere is mooi versorg en loop gemaklik op die kamp rond. Die eienaar oom Dup kom stel homself aan jou voor en maak seker jy kort niks nie. Dit is nie net 'n besigheid vir hom nie, maar iets waarin die oom baie waarde heg. Ons het in die kloof cabin gebly en dit was perfek. Die huisie het alles in wat jy graag wil hê! Die kinders het die water baie geniet en ons het dit geniet om in die water te sit en 'n regte Bosveld sonsak te geniet terwyl die vuurtjie se vlamme eenkant dans. Wat my opgeval het, is die persoonlike afdruk wat die eienaar vir ons as gaste gelos het. Die paaseitjies in 'n mandjie, bederf koffiesakkies langs die ketel, en 'n roompie, seepie en klein shampoo botteltjies op ons handdoeke. Waar kry 'n mens dit nog en dit in die Bosveld? Karee Krans is soos die beste medisyne, die voorskif wag vir jou ook!

Dit was so 'n lekker privaat plekkie gewees en alles was so mooi en skoon.

Dit was so lekker gewees!

Awesome! Will definitely come back again.

Dit is 'n pragtige plekkie in 'n besonderse ligging. Alles wat ons nodig gehad het vir 'n naweek. Die wonder van die Skeppershand is asemrowend.

Rustig. Privaat. Asemrowend.

Kloof Cabin was 'n lekker wegbreekplek, privaat en 'n entjie van die hoofkampterrein af. Die cabin het meer as wat mens nodig het vir selfsorg. Mense wat met 'n klein karretjie wil bly, sal ek eerder die Log cabin voorstel a.g.v. padtoestand na die Kloof cabin omdat die reën die klippe oopspoel. Hulle het wel moeite gedoen om die klipperige pad rybaar te maak sodat ons die cabin kon verlaat. Dit is 'n ideale cabin vir 'n groep wat 'n hoë kar of bakkie het.

Gerieflike huis en pragtige natuurskoon.

Heerlike paar dae in die bos met pragtige natuur rondom die huis en baie voëls. Niks en niemand wat pla nie, geen geraas rondom jou. Net die plek om te gaan afsluit saam met geliefdes.

Stunning bush experience.

Loved the log cabin. Such a beautiful setting right in the bush. Clean and equipped with everything we needed. Such a great getaway. Really loved the experience and will definitely be back.

I wouldn't recommend this place to anyone.

Management was unwelcoming. They placed our group of people in two different locations which were very far apart. The individuals who own the place were just plain rude, as if they were running a charity.

Privaat en rustige bosveld-kuier met plonspoel en Jacuzzi.

Rustige, romantiese wegbreek vir 'n paartjie of bosnaweek vir 'n gesin. Die plonspoel en Jacuzzi op die stoep met 'n klein boma vir atmosvuurtjie en 'n ingeboude braai, maak hierdie huisie 'n plek waar jy kan verkwik en herlaai. Die plaas het heerlike staproetes en mens kan ook die berge uitklim. Daar is 4x4-roetes. Nie geskik vir rondry en wild-kyk nie, maar die huisie is so lekker uitgerus dat mens nie omgee om net daar uit te hang nie. Huisie uitgerus met als wat nodig is, selfs koffie, tee, suiker en melk!

We absolutely loved it, relaxing and tranquil.

The drive was amazing from Alberton and our stay was thoroughly enjoyable. We will definitely be back. Pleasant and friendly vibe felt by all!

Baie lekker en rustig.

Dit was n baie mooi huisie om in te bly. Lekker rustig. Sal defnintief weer gaan.

Dit was baie lekker en rustig.

Sien sterre.

Heerlik!

Fantastiese, rustige bosveld-atmosfeer!!

Baie netjiese en veilige houthuis. Rustige omgewing en baie bokkies om te sien.

Al wat ek wel sal aanbeveel is dat 'n 4x4 die beste voertuig is tydens die reënseisoen.

Vreeslik rustig.

Net vêr genoeg geleë vir rustigheid, maar nie te vêr dat jy moeg daar aankom. Die kinders het die dam met canoes, glybaan en foefie-slide vreeslik geniet. Die een probleem wat ons ervaar het was spoedig aandag aan gegee en iemand is dadelik gestuur om hulp te verleen. Die 4x4-roete was redelik rof en ons het nie heeltemal so 'n moeilike pad verwag nie, maar dit was baie opwindend. Dit was baie rustig in die aand en al was ons nie so vêr van die kampeerders geleë, het ons niemand gehoor of sien. Defnitief 'n vakansie vir die boeke gewees!

Ongelooflik, ongerep en onvergeetlik.

Die 2de keer wat ons oor Desember, Karee Krans besoek. Selfs met 'n klein kar sal jy maklik die Kloof Cabin kan bespreek, vra net voor die tyd vir die bestuur om die paadjie te skraap of skoon te maak. Die cabin is skoon, netjies en baie gerieflik ingerig. Selfs skoonma het met haar loopraam in die bos reggekom. Alles wat jy nodig het om weg te breek. Vriendelike mense en amazing diens. Die uitsigte is, ongelooflik. Die natuur is ongerep en mooi skoon. Maklik stap roetes. Die tyd daar is onvergeetlik.

Wonderlik in die natuur. Die gasheer het ons baie goed ontvang en gehelp.

Die huis is in die berg en ver van alles en almal. Die pad is moeilik vir ’n lae motor. Die gasheer het ons gehelp om veilig by die huis te kom met sy 4x4. Dit was wonderlik.

Baie rustig gewees. Die familie het dit baie geniet.

Ons sal beslis weer by Karee Krans gaan kamp. Ons het dit baie geniet.

10 uit 10. Karee Krans kan net met lof beskryf word.

'n Juweel van 'n bestemming in die hartjie van die bos. Die eenheid is super luuks, netjies en skoon, en daar word aan al jou behoeftes voorsien. Die is natuurskoon is asemrowend mooi met iets om te doen vir die hele gesin. Ons is baie dankbaar vir die geleentheid wat ons gehad om 'n naweek by Karee Krans te kon deurbring. Ons sal beslis gereel terug gaan en almal aanbeveel wat opsoek is na ideale wegbreek uit die stad se besige en gejaagde lewe.

Pragtige plek, baie om te doen en privaat.

Ons het dit so baie geniet. Dit was ’n lekker manne-naweek - net ons en die seuns. Die plek is lekker naby aan Rustenberg, die kampstaanplekke is goed geleë in die bos en die houthuis is amazing. Daar is so baie om te doen as ’n groep - ons het lekker vis gevang, saam met die kinders in die dam geswem en 4x4 gery. Dit is ook ideaal vir ’n naweek weg as ’n paartjie. Baie privaat, stil en veilig. Ons kom definitief sommer gou weer.

Awesome plek met uitstekende, vriendelike diens.

Karee Krans is netjies, skoon en maklik om te kry. Die mense is vriendelik en baie gasvry. Gaan weer die selfde plek bespreek.

'n Lekker naweek met uitdagings.

Karee Krans is 'n oulike plek met baie potensiaal. Ons het spesifiek Karee Krans gekies vir die privaatheid van die log cabin met sy eie swembad. Ongelukkig met die aankoms was die swembadjie baie vuil en sonder water. Dus het ons gedink dit is buitewerking. Niemand het vir ons verduidelik hoe dit werk nie. Ons het ook eers Saterdag uitgevind dat die groot swembad wat op die webblad geadverteer word eintlik net vir 'n sekere groep is wat daar bly, en in elk geval ook sonder water en buite werking was. Darem was daar nog 'n swembad wat ons kon gebruik. Geen vullis is gedurende die naweek verwyder nie. Daar was ook nie vullissakke gewees nie. Geen toiletpapier is vervang nie en daar is ook nie 'n winkel naby om so iets te gaan koop nie. Met die vertrek uit Pretoria Vrydag het ons gebel en gevra of ons hout sal kan kry en met die aankoms was daar vir ons geen hout nie, so kon dus nie vuur maak Vrydagaand nie. Vrydagaand was die weer swaer en daar was 'n kragonderbreking wat 'n groot gedeelte van die area beïnvloed het. Helga, wat ons gehelp het, was nie baie behulpsaam met die vrae wat ons gehad het oor die krag nie. Ons was daar met klein kindertjies en sy het net gesê daar is geen moontlikheid van 'n generator nie. Ons het oorweeg om Saterdagmiddag te vertrek. Die eienaar van Karee Krans het toe egter by ons kom draai en hulp aangebied om 'n moeilike situasie te probeer red, hul kon ekstra hout bring, liggies en 'n gasbottel. Hy het nog 'n aand se verblyf gratis aangebied wat ongelukkig onmoontlik was vir ons. Dit is vir my jammer dat die eienaar se bestuur hom in die steek gelaat het, en ook dat ons steeds die volle prys betaal het vir 'n naweek wat ons nie alles kon kry wat belowe is nie. Ek sal graag weer Karee Krans wil besoek indien al die probleme opgelos is. Maar nou voel ek ek het geld verloor.

Bietjie teleurgestel.

Dis 'n baie lekker oord ─ met 'n bietjie aandag kan dit soveel lekkerder wees. As gevolg van vloede was meeste van die 4x4-roetes onrybaar, maar ons moes die volle bedrag betaal om te kon ry. Die badkamers kan bietjie opgeknap word ─ die deure en showers is stukkend. Ons moes vra vir toiletpapier en die nege dae wat ons daar was, was die damesbadkamer net een keer skoongemaak. Die winkeltjie kan miskien in vakansietyd bietjie meer goed aanhou soos brood. Dalk bietjie meer beligting by die kampplekke. Die ligte wat wel daar is werk nie. Die dag voor ons vertrek het hulle bietjie moeite gedoen om die gras by die kamp plekke bietjie korter te sny.

Uitstekend.

Baie lekker gebly en sal weer gaan.

Baie stil en rustige omgewing.

Baie droog. Net 1 van die 3 damme het water in. Die hindernisbaan is verwaarloos en ons kon dit regtig benut nie. Die houthut was lekker, maar baie basies vir wat ons betaal het. Geen stoof nie. Die eenplaat-stofie werk nie met die panne of potte nie. So ons kon nie ontbyt maak nie. Daar is geen plek in die stort om jou seep te sit nie, wat bietjie ongemaklik was. Alhoewel die stort baie lekker werk. Dis 'n baie lekker rustige plek. Ver van die stad af. Die swembadjie by die houthuis was heerlik en ons het dit baie geniet. Die personeel was baie behulpsaam. Ek voel net dis nie regtig waarde vir wat ons betaal het nie.

Die akkommodasie was goed maar daar is nie veel om te doen daar nie, tensy mens 'n 4x4-voertuig het.

Ek sal nie maklik weer in daardie omgewing plek bespreek nie - daar is nie veel om te doen nie en dit kan vervelig raak.

Dit was bevredigend.

Met groot opgewondenheid het ons die kar gepak vir 'n lekker kamp naweek in die bos. Daar aangekom was ons aangenaam verras oor hoe groot ons staanplek was. Ons het lekker gaan stap, fietsgery, geswem en selfs bietjie 4x4 gaan ry. Dit was egter Saterdagoggend wat 'n bitter smaak in die mond gelos het nadat die kinders se fietse gesteel was. Die eienaar het probeer help, maar kon niks kry behalwe spore. Hy het gesê dat ek en hy iets sal uitsorteer oor die bybetalings as ek dit kan eis. Hy het egter gou sy storie verander nadat my versekering laat weet die fietse is nie gedek nie. Ek moes hoor dat hy jammer is maar dis nou maar so. So ja, as jy daar wil gaan kamp bring maar jou eie wag saam om jou goed op te pas of bring jou versekering op datum.

Lekker gesinswegbreek in die natuurskoon.

Baie lekker netjiese kampeerplek, vriendelike ontvangs, sal vir seker weer hier gaan kamp!

Asemrowende uitsig en ligging met 'n tjoepstil natuur om jou!

Enige tyd weer, sal aanbeveel vir groot groep kuiers ook!

Heel rustig en 'n goeie wegbreek.

Mense was baie vriendelike en die plaas/oord was ongelooflik lekker dinge om mens heel dag besig te hou en mooi natuur-ryke gebied om te bewonder

Pragtige natuur.

Die plek is vanaf 'n natuurskoon oogpunt ongelooflik mooi. Die 4x4 roete is heerlik. Die fasiliteite meer as voldoende. Ek was egter teleurgesteld met die afdwing van kampreëls. 'n Groep mense het op die tweede dag van my verblyf ingetrek en so lawaai (harde musiek, besope bakleiery ens). Ek het die bestuur probeer opspoor om die reëls af te dwing maar kon hulle nie in die hande kry nie. Uiteindelik het ek my verblyf kortgeknip met twee dae en huis toe gekom. Andersins is die plek aan te beveel.

Sou die rustigheid daar meer kon waardeer as ander kampers meer bedagsaam was en nie raas laatnag met harde musiek en lawaai nie.

Die stortgeriewe is nie privaat genoeg nie, miskien 'n behoorlike muur oprig tussen die twee storte in die ablusieblok, veral aan die dames se kant. Die 4x4-roetes is regtig mooi beplan en uitgelê. 'n Pragtige omgewing en die gasheer met sy vroutjie was aangenaam en behulpsaam. Ons kon hul net nie opspoor om te groet en te bedank toe ons 'n dag vroeër vertrek het weens ongesteldheid nie. Ons het baie lekker gekuier!

Ervaring.

Ons was ontvang deur Riaan en Marlize asof ons ou kennisse is. Ons beveel dit definitief aan.