Sedgefield Kingfisher Cottage

Selfsorg

Kapasiteit: 6 persone
Alle ouderdomme is welkom
Inkloktyd: 14:00 tot 21:00
Uitkloktyd: 10:00
Adres: Kingfisher-rylaan 23, Sedgefield, 6573, Wes-Kaap
Vanaf R1 950 per nag, vir 6 mense

Beskrywing

Sedgefield Kingfisher Cottage bied selfsorgverblyf in 'n stil, troeteldiervriendelike, voëlryke tuin oorkant die strandmeer in Sedgefield. Die kothuis skuil agter die hoofhuis. 'n Geplaveide paadjie wat saans verlig word, lei al langs die strandmeer af tot by die strand en jetty. Langs dié paadjie is dit ook net 600 m na die middedorp. Buite die kothuis is 'n mosaïekbankie waar jy kan sit en die sonsopkoms, sonsondergang, berg, strandmeer en natuurlewe kan dophou. Alles is naby en die rustige dorpie het so baie om te bied.

Daar is 2 selfsorgkothuise - Sedgefield Kingfisher en Sedgefield Lagoon Hideout. Die kothuise is oorkant mekaar op dieselfde perseel. Albei is vir selfsorg toegerus en het hul eie kombuise, leefareas en stoepe. WiFi en DStv is beskikbaar. Daar is 'n kragwisselaar om krag te voorsien tydens beurtkrag.

Sedgefield Kingfisher is ideaal vir 'n gesin of 'n groep vriende en bied verblyf aan 6 gaste. Dié kothuis het 3 slaapkamers, 2 badkamers en 'n oopplan-kombuis, -eetarea en -leefarea. Die slaapkamers en hoofbadkamer met 'n bad is op die boonste verdieping. Die eerste slaapkamer het 'n koninggrootte-bed en 'n houtkot vir 'n baba. Die tweede slaapkamer het 'n koninggrootte-bed en 'n enkelbed. Die derde, kleiner, slaapkamer het 'n enkelbed. Die kombuis, eet- en leefarea, badkamer met 'n stort, wasmasjien en tuimeldroër is op die onderste verdieping.

Die kombuis is vir selfsorg toegerus en het 'n toonbank met stoeltjies, asook 'n skottelgoedwasser. Die eetarea het 'n hout eetkamerstel met sitplek vir 6. Die sitkamer het 'n platskerm-TV en skuifdeure wat na 'n privaat stoep met 'n ingeboude braai lei.

Daar is 'n lieflike tuin met 'n berguitsig en heelwat speelruimte. Daar is 'n parkeerplek oorkant die kothuis op die perseel. Toegang na die perseel is via 'n elektriese hek.

Die kothuise kan daagliks op versoek skoongemaak word teen ekstra koste. Gaste het ook toegang tot die oprit en 'n ruim agtertuin. Gaste kan kajakke op die perseel teen 'n ekstra koste huur

Kry ’n Kwotasie