Dis net sand wat spat en ’n stert wat swaai,
want Wagter hardloop na hartelus.
Hy sny ’n lyn reguit na die baai.
O, dis lekke vir ’n hond aan die Weskus!

Sien jy altyd op na die hartseer afskeid wanneer jy met vakansie gaan en jou hondekinders by die huis moet los? Dis glad nie nodig nie! LekkeSlaap het 10 lekker, troeteldiervriendelike blyplekke langs die Weskus uitgesnuffel waar jou vierpoot-kroos ook welkom is.  

West Coast Luxury Tents

West Coast Luxury Tents

Op ’n privaat Weskusplaas agter ’n sandduin net ’n entjie vanaf die see, skuil drie luukse tente wat elkeen slaapplek het vir twee. Elke selfsorgtent het ’n en suite-badkamer, kombuisie en privaat braai vir kuiers om die vuur. Daar is ook eindelose strande vir jou en Brakanjan se plesier.

Waar: Tussen Elandsbaai en Dwarskersbos
Verblyf: Drie luukse en suite-tente wat elkeen slaapplek het vir twee tot vier gaste.
Ekstras: Privaat braaiplek, privaat kombuisies
Onthou: ’n 4×4-voertuig word aanbeveel. Daar is ’n winkel sowat 25 kilometer ver met basiese voorrade en ’n Spar, Liquor City en vulstasie 35 kilometer ver.

Troeteldiere is welkom mits dit vooraf gereël word.

West Coast Luxury Tents

Buffalo Drift – Captains Cabin

Buffalo Drift - Captains Cabin

Is jy op soek na ’n see-wegbreek vir ’n groot, gesellige groep? Dan is Buffalo Drift – Captains Cabin die een wat jou naam roep! Met slaapplek vir 26 gaste en toegang tot ’n privaat strand, is dié rustieke selfsorghuis die ideale plek om te beland. Nooi sommer die hele familie en laai ook vir Ore in. Só ’n wegbreek is mos vir jóú beskore!

Waar: Yzerfontein
Verblyf: Selfsorghuis met slaapplek vir 26 gaste in sewe slaapkamers.
Ekstras: Die kombuis word elke oggend skoongemaak, ’n braaiplek.
Onthou: Hou asseblief by die spoedgrens van 30 km/h om die rustigheid te behou en wilde diere te beskerm. Daar is nie ’n TV in die eenheid nie.

Troeteldiere word teen R50 per nag toegelaat, indien dit vooraf word.

Buffalo Drift - Captains Cabin

Beach House on Fairway

Beach House on Fairway

In die lieflike Langebaan skuil daar ’n selfsorgvakansiehuis vir ses. Jy kan hiér langs die swembad of braai ontspan en vergeet van al jou stres! Die huis is langs ’n gholfbaan met ’n uitsig oor die strandmeer, en as Fiefie wil saamkom, wie sal haar dan keer?

Waar: Langebaan
Verblyf: Selfsorghuis met slaapplek vir ses gaste in drie slaapkamers. Twee ekstra gaste is welkom op versoek.
Ekstras: Drie braaiplekke, ’n swembad, WiFi, DStv, lugversorging, veilige parkeerplek

Troeteldiere is welkom indien dit vooraf gereël word. Groter honde moet liefs buite slaap en kleiner honde moet asseblief nie op die beddens of meubels slaap nie.

Beach House on Fairway

Stay in Hocus Pocus Cottage

Stay in Hocus Pocus Cottage

Paternoster se afgewitte vissershuisies langs die kus lyk darem al te fraai! Hocus Pocus Cottage is net één van hulle en die see is net om die draai. Dié semi-losstaande selfsorgkothuis is luuks ingerig en die balkon is die ideale plek vanwaar jy die pragtige uitsig kan geniet. Daar is slaapplek vir vier gaste, so bring die gesin – en Vlekkie bly verniet!

Waar: Paternoster
Verblyf: Selfsorgkothuis met slaapplek vir vier gaste in twee slaapkamers.
Ekstras: Kaggel, buitebraai, DStv, restaurant op die perseel, WiFi, spa-behandelinge en masserings
Onthou: Die huis is drie strate van die see af, maar die balkon spog met ’n see-uitsig.

Goedgemanierde, gesosialiseerde troeteldiere is welkom indien dit gereël word. Bring asseblief jou hond se bedjie, beddegoed en kosbakkies saam en onthou om te alle tye toesig oor Vlekkie te hou, sodat hy nie op die meubels klim of hare in die huis mors nie.

Stay in Hocus Pocus Cottage

Swept Away Guesthouse

Swept Away Guesthouse

Gooi die venster oop en laat die vars seelug in. Swept Away Guesthouse in Yzerfontein is die ideale plek om jou kragte te herwin! Van selfsorg-eenhede tot romantiese gastekamers vir twee, dié gastehuis bied iets vir elkeen én ’n fantastiese uitsig oor die see. Daar is ook slaapplek vir jou geliefde hondekind, so kom deel jou vakansielus met jou stertswaai-hart-se-punt.   

Waar: Yzerfontein
Verblyf: Vier gastekamers met slaapplek vir twee en twee selfsorg-eenhede met slaapplek vir twee.
Ekstras: Braaiplek, ’n groot tuin waarin jou hond veilig kan speel, DStv, WiFi, wasgoeddiens
Onthou: Van die eenhede word met trappe bereik.

Goedgemanierde, gesosialiseerde troeteldiere is welkom teen ’n ekstra koste van R150 in kontant.  

Swept Away Guesthouse

Blouhuisie

Blouhuisie

Is ’n gesinsvakansie langs die see op jou emmerskoplysie? Kom bly dan gerus in Britanniabaai se stylvolle Blouhuisie! Dié huis spog met ’n buitestort en die see skuil net anderkant die duin. Daar is ook ’n braai en ’n groot dek vir buitelug-samesyn. Steek die kaggelvuur aan, dan kuier almal binne — Ouma, Pa, die hele kroos, asook die honne-kinne!

Waar: Britanniabaai
Verblyf: Selfsorghuis met slaapplek vir agt gaste in drie slaapkamers.
Ekstras: Braaiplek, buitestort, direkte toegang tot die strand, kaggel, skoonmaakdiens ingesluit vir langer verblyf.
Onthou: Gaste moet asseblief hulle eie DStv-dekodeerder en -slimkaart saambring.

Troeteldiere is welkom indien dit gereël word.

Blouhuisie

Dunstone Beach House

Dunstone Beach House

By Dunstone Beach House is dit een, twee, drie en jy is op Jacobsbaai se strand met jou woef wat om jou voete draai en jou sonhoed in jou hand. Skuif die deure wawyd oop en stap uit op die dek — met ’n glasie wyn en die sonskyn is dié prentjie mos perfek!

Waar: Jacobsbaai
Verblyf: Selfsorghuis met slaapplek vir agt gaste in vier slaapkamers.
Ekstras: DStv, braai, lugversorging.
Onthou: Bring asseblief jou eie braairooster saam as jy wil braai. Daar is geen WiFi nie, so bring sommer jou eie internetstokkie saam.

Troeteldiere is welkom indien dit gereël word.

Dunstone Beach House

Stay at Emily in Paternoster

Stay at Emily in Paternoster

As jy moeg is vir die stad en na rus vir jou siel smag, is die selfsorg-eenhede by Stay at Emily net die plek om te oornag. Met hulle blou hortjiesvensters en afgewitte mure lyk dié drie eenhede al te fraai. En as jy die see soek is dit net ’n entjie se stap saam met jou hond in die straat af tot by Bekbaai.  

Waar: Paternoster
Verblyf: Een selfsorgkothuis met slaapplek vir vier en twee selfsorg-eenhede met slaapplek vir twee.
Ekstras: Gratis WiFi, braaiplek, veilige parkeerplek, DStv

Troeteldiere is welkom. Laat weet net vooraf watter soort troeteldier jy saambring.

Stay at Emily in Paternoster

Montserrat Oceanfront Beach Villa

Montserrat Oceanfront Beach Villa

Nader aan die see sal jy nie sommer kry nie, so waarom nie by Montserrat Oceanfront Beach Villa bly nie? Dié moderne huis is op ’n landgoed in St. Helenabaai geleë en smelt soomloos saam met die omliggende strand en see. Kom ontspan op die dek met jou hond aan jou sy en gaan stap langs die strand tydens laaggety. Miskien besluit jy om vir altyd te bly!

Waar: Sandy Point
Verblyf: Selfsorghuis met slaapplek vir agt gaste in vier slaapkamers.
Ekstras: Gratis WiFi, braai, veilige parkeerplek, DStv

Troeteldiere is welkom indien dit gereël word.

Montserrat Oceanfront Beach Villa

Sugar Shack

Sugar Shack

Kan jy die vars seebries ruik? Dan is dit mos vakansietyd! Kom span uit in die hangmat en gooi ’n lekker vars snoek oor die kole! Sugar Shack is nét die plek om weer ’n lus vir die lewe te ontdek. Klink dit perfek? Laai dan vir Lucky in die bakkie en pak af Paternoster toe!

Waar: Paternoster
Verblyf: Selfsorghuis met slaapplek vir ses gaste in drie slaapkamers.
Ekstras: Braai, veilige parkeerplek, 24 uur-sekuriteit, DStv

Troeteldiere is welkom indien dit gereël word.

Sugar Shack

Moeg vir stres en werk? Wel, ná hierdie blog is jy oor die hond se stert! Kies, kliek en bespreek ’n lekker vakansie vir jou en Vlekkie. Aan watter deel van ons mooi kuslyn soek jy en Brakanjan ’n plekkie? Laat weet ons!

Hooffoto: Bigstock
Alle ander foto’s van LekkeSlaap.